كتِّر خير الله على كل شي…
غير هالعبارة، يللي بيرددها الجميع هالإيام، قليل اللي ممكن ينقال عن ال2021، إذا بدنا نكون ايجابيين بليلة هالعيد.
فشو ممكن نقول مثلاً عن سنة ولدت فيها بعد طول انتظار، حكومة ممنوع تجتمع، وتعرقلت فيها العدالة بجريمة من مستوى انفجار مرفأ بيروت، حتى ما نحكي عن التدقيق الجنائي ومعظم ملفات الفساد؟
شو ممكن نقول عن سنة ما انوضعت فيها على السكة الصحيحة، الحلول الملحة لأزمات ما عم تعرف تخلص، بالاقتصاد والمال وكل شؤون الحياة؟
شو ممكن نقول عن سنة تمكنت فيها المنظومة الفاسدة من عرقلة معظم محاولات الاصلاح، وشلت كل المؤسسات، وصولاً بالمرحلة الاخيرة للمجلس الدستوري؟
شو ممكن نقول عن سنة ارتفع فيها سعر تنكة البنزين من 40 ألف لأكتر من 300 ألف ليرة، من بعد ما شهدنا عودة لمشاهد الحرب من خلال طوابير الذل على محطات المحروقات؟
شو ممكن نقول عن سنة صار فيها تأمين ثمن المازوت للتدفئة هدف، وتأمين الدوا حلم، والدخول للمستشفى انجاز.
شو ممكن نقول عن سنة ارتفعت فيها اسعار المواد الغذائية بشكل جنوني، وصارت فيها معظم المواد الضرورية من الكماليات؟
فعلاً قليل اللي ممكن ينقال عن ال2021، إذا بدنا نكون ايجابيين بليلة هالعيد.
أما عن ال2022، فالعكس هوي الصحيح، وكتير اللي ممكن ينقال…
كتير اللي ممكن ينقال، لأنو السنة الجديدة مش ممكن إلا ما تكون سنة أجوبة كبيرة على أسئلة أكبر.
أجوبة عن مصير تحالفات أساسية، وتوجهات جوهرية.
أجوبة عن استحقاقات كبيرة، نيابية وبلدية ورئاسية.
أجوبة عن قرارات كبيرة مطلوبة، بالحوار واللامركزية الادارية والمالية، والاستراتيجية الدفاعية، والتعافي المالي والنهوض الاقتصادي.
أجوبة عن مفاوضات مفصلية، مع صندوق النقد الدولي، وبملف ترسيم الحدود البحرية.
أجوبة عن إنسان لبناني قرر يكون مواطن، ويفضح كل الشعارات الكاذبة والعناوين الخادعة.
أجوبة عن فاسد صار لازم يتسمى بالإسم، بلا طائفية أو مذهبية، وفاشل صار لازم ينعرف بوضوح، من دون قلق ولا خوف، حتى لو تلون بمية لون ولون.
أجوبة عن أخطاء ممنوع إلا ما تتصحح، وتجارب سيئة مرفوض إنها تتكرر.
كتير اللي ممكن ينقال عن السنة الجديدة، وقليل اللي ممكن تنذكر فيه السنة اللي عم تخلص، بلا ما ينعاد.
وبالنهاية متل البداية، بيبقى لسان حالنا جميعاً: كتِّر خير الله على كل شي، وانشالله السنة الجديدة بتكون سنة خير للجميع، وبينعاد عليكن وعلينا بظروف افضل. ومنشير الى انو ابتداء من الساعة 8.15 من هالليلة، ليلة راس السنة على ال أو.تي.في. بتبلش مع حلقة خاصة تحت عنوان “رح نبقى سوا من سنة لسنة”، وبتتبعها حلقة اخرى خاصة من برنامج حقك بإيدك.