في اليوم الذي كان يفترض أن يكون يوم زفافهما، توجه جيلبير قرعان عبر “انستغرام” إلى خطيبته الشهيدة سحر فارس التي قضت بانفجار مرفا بيروت بكلمات مؤثرة:
6/6/2021 كان يوم الحلم ، كان يوم يلي بدي شوفك في بفستانك الأبيض ، اليوم يلي كنّا ناطرينو من بعد 7 سنين شقا و شغل وتعب، هيدا النهار يلي كنّا رح نصير في تحت سقف واحد انا وياكي و نعمل احلى عيلة ، هيدا النهار يلي كان لازم شوفك في عروس عم ترقص مع الزفّة انت و طالعة من بيت اهلك والزلاغيط متلاّية الدني ، هيدا النهار يلي كان لازم تكوني واقفي حدّي في لابسي فستانك الأبيض وعيوني مدمعة من الفرح ، انا واثق انك هلق انت واقفي حدي و لابسي ابيض ، يا ريت الزمن بيرجع والريسيتال يرجع عرس و الغصّة ترجع فرحة و الدموع يصيروا دموع فرح
4 آب 2020 يوم استشاهدك ، مش غريب يمكن الوقت و الزمن و التاريخ انو نعملك عرسك عالسما و نزفّك عروس بي /6/8/2020و نحنا كان عرسنا بي 6/6/2021، نفس اليوم ،كرمال هيك من هالنهار وطالع، رح تشوفي جيلبير متل مكنتي تحبّي و تشوفي حالك في قوي و ضحكان عطول وانت رسيميلي طريقي وحياتي وحطّي الناس يلي بتشبهك و بتشبه قلبك و روحك بطريقي
هيدا النهار لألك ، كرمال هيك حبيت حولوا متل ما انت بتحبي ، ليلة تراتيل صلاة فيها فرح و رجا،ويلي كان بدك يكون كان ، ويلي بدك كان تعملي عملتوا، زينة الورد و الشوكولا والحمام كلّو كان موجود ،رح يكون نهار عطاء متل عطائك و مسيرتك ، متل مكنتي تحبي تساعدي العالم و المحتاجين والفقراء ، كوكتيل عرسنا تقدّم للمحاتجين بي 100 حصة غذائية للفقراء و المحتاجين بأكتر ضيعتين كنتي تحبيهن الجديدة والقاع ، وبعض الفحوصات الطبية للمسنين يلي كانوا نقطة ضعفك ،وغيرها عن روحك الحلوة يلي عم ترفرف بالسما يا عروس
نيّال السما فيكي يا قدّيسة ،نيّال السما فيكي يا سحر ، نيّال السما بقلبك الطيب ، نيّال السما بروحك الحلوة ، ٢٧ سنة من حياتك على الارض و عطائك يلي ما الو حدود كانت كفيلة تخلّد اسمك للأبد بقلوب و بيوت كل الشعب اللبناني ، خلّي عينك علينا يا عروس وصليلنا نحنا بحاجتك كتير”.

 

https://www.instagram.com/p/CPxSpwgMjjL/?utm_source=ig_web_copy_link

WP Twitter Auto Publish Powered By : XYZScripts.com